युक्रेन युद्धमा रुसलाई समर्थन गर्ने किम जोङ उनकाे प्रतिबद्धता

मेयरसाप डेस्क | ६ घण्टा अगाडि

एजेन्सी । उत्तर कोरियाली नेता किम जोङ उनले रुसका विदेशमन्त्री सर्गेई लाभरोभसँगको भेटवार्ताका क्रममा युक्रेनमा जारी युद्धमा मस्कोलाई पूर्ण समर्थन गर्ने प्रस्ताव राखेका छन् ।

रुसको युक्रेनमाथिको आक्रमणबीच दुई देशले सैन्य र राजनीतिक सम्बन्धलाई अझ गहिरो बनाइरहेका बेला लाभरोभको यो भ्रमण रुसी शीर्ष अधिकारीहरूको उच्च–स्तरीय भ्रमण शृंखलाको पछिल्लो कडी हो ।

आधिकारिक केसिएनए समाचार एजेन्सीका अनुसार, किम र लाभरोभले शनिबार न्यानो कमरेडेली विश्वासले भरिएको वातावरणमा भेटवार्ता गरेका थिए । रुसको विदेश मन्त्रालयले टेलिग्राममा दुई नेताले हात मिलाउँदै र अँगालो हालेर अभिवादन गरेको भिडियो पोस्ट गरेको छ । यो वार्ता देशको पूर्वी तटमा रहेको वोनसानमा भएको थियो, जहाँ यस महिनाको सुरुमा एक विशाल रिसोर्ट खोलिएको थियो ।

केसिएनएले किमले लाभरोभलाई उत्तर कोरिया ‘युक्रेनी सङ्कटको मूल कारणको सामना गर्ने सन्दर्भमा रूसी नेतृत्वले चालेका सबै उपायलाई बिना शर्त समर्थन र प्रोत्साहन गर्न तयार छ’ भनेको उल्लेख गरेको छ । उत्तर कोरियाली नेताले ‘देशको मर्यादा र आधारभूत हितको रक्षा गर्ने पवित्र उद्देश्य पूरा गर्न रूसी सेना र जनताले निश्चित रूपमा विजय हासिल गर्नेछन्’ भन्ने दृढ विश्वास पनि व्यक्त गरेका थिए ।

केसिएनएका अनुसार, दुई नेताले सन् २०२४ जुनमा भएको ऐतिहासिक उत्तर कोरिया–रुस शिखर वार्तामा भएका सम्झौताहरूलाई विश्वासपूर्वक कार्यान्वयन गर्ने महत्त्वपूर्ण विषयहरूमा छलफल गरे। रुसी राष्ट्रपति भ्लादिमिर पुटिनको उत्तर कोरियाको दुर्लभ भ्रमणका क्रममा दुई भारी प्रतिबन्धित मुलुकले गत वर्ष आपसी रक्षा खण्डसहित सैन्य सम्झौतामा हस्ताक्षर गरेका थिए ।

रुसी राज्य एजेन्सी तासका अनुसार, लाभरोभले किमलाई पुटिनले ’निकट भविष्यमा प्रत्यक्ष सम्पर्क जारी राख्ने आशा’ गर्नुभएको बताएका थिए । रुस र उत्तर कोरियाका सरकारी मिडियाले लाभरोभ आइतबारसम्म उत्तर कोरियामा रहने बताएका छन् ।

यसअघि शनिबार, लाभरोभले आफ्ना समकक्षी चो सोन हुईसँग भेटवार्ता गरेका थिए र रुसलाई सहयोग गर्न तैनाथ गरिएका ’वीर’ उत्तर कोरियाली सैनिकहरूलाई धन्यवाद दिएका थिए । रुसको विदेश मन्त्रालयले दुवै पक्षले उत्तरपूर्वी एसिया र सम्पूर्ण एसिया–प्रशान्त क्षेत्रमा तनाव बढाउँदै गैर–क्षेत्रीय खेलाडीहरूको आकांक्षालाई संयुक्त रूपमा सामना गर्ने आफ्नो दृढ सङ्कल्पमा जोड दिएको बताएको छ ।

भ्रमणअघि रुसले मस्को र प्योङयाङबीच हप्तामा दुई पटक उडान सुरु गर्ने घोषणा गरेको थियो । लाभरोभले वोनसानलाई ’एक राम्रो पर्यटकीय आकर्षण’ भन्दै प्रशंसा गरे र यो स्थानीय नागरिकहरूमाझ मात्र नभई रुसीहरूमाझ पनि लोकप्रिय हुने आशा व्यक्त गरे ।