‘सरकार र जेन–जीबीचकाे सम्झौता कलाविहीन भद्दा नाटक’

वर्तमान सरकार गोबर लगाएर टाँसिएको नाग जस्तो

मेयरसाप डेस्क

काठमाडौं । पूर्व प्रधानमन्त्री तथा एमाले अध्यक्ष केपी शर्मा ओलीले सरकार र जेन–जी अगुवाहरूबीच भएको सम्झौतालाई कलाविहीन नाटकको संज्ञा दिँदै त्यसको हिजै पटाक्षेप भएको टिप्पणी गरेका छन् ।

आज सम्पादकहरूसँगको अन्तरक्रियामा बोल्दै ओलीले वर्तमान सरकारसँग त्यस्तो सम्झौता गर्ने म्यान्डेट नै नभएको दाबी गरे ।

ओलीले भने, “जति कलाविहीनताका साथ नाटकको पर्दा उठेको थियो, त्यही कलाविहीनताका साथ पटाक्षेप भएको छ । यो सरकार कुनै त्यस्तो सम्झौता गर्नै सक्दैन ।”

जेन–जी समूहले नै उक्त फजुल कागज अस्वीकार गरेको र च्यातिएको उल्लेख गर्दै उनले आफूले त्यस्ता फजुल कागजहरूलाई कुनै मान्यता नदिने बताए ।

ओलीले वर्तमान सरकारलाई नाग पञ्चमीमा गोबर लगाएर टाँसिएको नाग जस्तो भएको भन्दै कटाक्ष पनि गरे ।