काठमाडौं । काठमाडौंको दक्षिणकाली भन्ज्याङमा विद्यार्थी सवार स्कुल बस दुर्घटना भएको छ । ५० विद्यार्थी सवार बस दक्षिणकाली नगरपालिकाकै जुनकिरी स्कुलको रहेको प्रहरीले जनाएको छ ।

बसका चालकको घटनास्थलमै ज्यान गएको काठमाडौं प्रहरी परिसरका प्रवक्ता प्रहरी उपरीक्षक (एसपी) अपिल बोहराले बताए । विद्यार्थीलाई घर लैजाँदै गरेको बा १ क ५६६४ नम्बरको स्कूल बस आइतबार अपराह्न दुर्घटना भएको हो । बसमा ५० विद्यार्थी सवार थिए ।

उपत्यका ट्राफिक प्रहरी कार्यालयका प्रवक्ता एसपी सञ्जयकुमार रावतका अनुसार बस सडकबाट केही तल खसेको छ । स्कूल छुट्टी भएपछि विद्यार्थीलाई घर पुर्‍याउने क्रममा बस दुर्घटनामा परेको हो । बसमा सवार २५ जना घाइते भएका छन् । घाइतेमध्ये केही विद्यार्थीको अवस्था गम्भीर रहेको जनाइएको छ ।

अहिले घटनास्थलमा प्रहरी पुगेर उद्धार कार्य जारी रहेको जिल्ला प्रहरी कार्यालय काठमाडौँका एसपी अपिलराज बोहोराले जानकारी दिए ।