प्रधानमन्त्रीबाट हटाउन खाेजेकाे हल्लाबीच कार्कीले गरिन् कल्याण श्रेष्ठसँग भेटघाट

प्रधानमन्त्रीलाई श्रेष्ठको आग्रह,‘निर्वाचन सम्पन्न गरेर मात्र तपाईं निस्कनुपर्छ’

मेयरसाप डेस्क

काठमाडौँ । प्रधानमन्त्री सुशीला कार्कीले पितृशोकमा रहेका पूर्वप्रधानन्यायाधीश कल्याण श्रेष्ठसँग भेट गरेकी छिन्। 

पछिल्लाे समय नेपाली मिडियाहरूमा पूर्वप्रधानन्यायाधीश कल्याण श्रेष्ठले राजनीतिक दलहरूसँग सम्पर्क गरी प्रधानमन्त्रीबाट शुशिल कार्कीलाई हटाउने योजना बनाएको समाचार प्रकाशित भएकै बेला प्रधानमन्त्री कार्कीले आज कुपण्डोलस्थित श्रेष्ठको निवासमा पुगेर भेट गरेको उनका प्रेस संयोजक रामबहादुर रावलले जानकारी दिए । भेटमा मुलुक र समसामयिक राजनीतिक विषयमा पनि कुराकानी भएको थियो । 

भेटमा पूर्वप्रधानन्यायाधीश श्रेष्ठले शान्तिपूर्ण वातावरणमा निर्वाचनका लागि शुभकामना दिएका थिए। रावलका अनुसार श्रेष्ठले कार्कीसँग भनेका थिए, “जसरी पनि चुनाव सम्पन्न गर्नुपर्छ, निर्वाचन सम्पन्न गरेर मात्र तपाईं निस्कनुपर्छ, हाम्रो शुभकामना छ ।”

श्रेष्ठका बुबा पूर्वन्यायाधीश कुलबहादुर श्रेष्ठको यही मङ्सिर १६ गने ९५ वर्षको उमेरमा निधन भएको थियो । 

पूर्वप्रधानन्यायाधीश श्रेष्ठले पछिल्लो समय आफ्नो नाम जोडेर विभिन्न समाचारहरू आइरहेको र ती भ्रामक रहेकाबारे प्रधानमन्त्री कार्कीलाई स्पष्ट गरेकाे जनाइएकाे छ ।