ट्रम्पको दाबी : इरानका सर्वोच्च नेता खामेनी मारिए

इरानले भन्यो, ‘उहाँ जीवित हुनुहुन्छ’

मेयरसाप डेस्क

काठमाडौं । अमेरिकी राष्ट्रपति डोनाल्ड ट्रम्पले इरानका सर्वोच्च नेता अली खामेनी मारिएको दाबी गरेका छन्। सामाजिक सञ्जाल ‘ट्रुथ’मा गरिएको पोस्टमा ट्रम्पले खामेनीलाई “इतिहासका सबैभन्दा क्रूर व्यक्तिहरूमध्ये एक” भन्दै उनको मृत्यु भएको उल्लेख गरेका हुन्। उनले यसलाई इरानका जनता र खामेनीको नीतिका कारण प्रभावित अन्य देशका नागरिकका लागि न्याय भएको दाबी गरेका छन्।

यसैबीच, इजरायलले २८ फेब्रुअरीमा तेहरानसहित इरानका विभिन्न सहरहरूमा हवाई आक्रमण गरेको जनाएको छ। इजरायलले उक्त सैन्य कारबाहीलाई ‘लायन रोर’ नाम दिएको छ भने अमेरिकाले ‘अपरेशन एपिक फ्युरी’ नाम दिएको बताइएको छ। इजरायली प्रधानमन्त्री बेन्जामिन नेतन्याहुले पनि खामेनी मारिएको संकेत देखिएको बताएका छन्, तर उनले ठोस प्रमाण सार्वजनिक गरेका छैनन्।

तर इरानका विदेशमन्त्री अब्बास अराघ्चीले सर्वोच्च नेता जीवित रहेको दाबी गरेका छन्। उनका अनुसार खामेनी सुरक्षित स्थानमा रहेका छन् र देशको नेतृत्व गरिरहेका छन्। इरानको रेड क्रिसेन्ट सोसाइटीका अनुसार अमेरिका र इजरायलका आक्रमणमा २०० भन्दा बढी व्यक्तिको मृत्यु भएको छ भने ७४० भन्दा बढी घाइते भएका छन्।

८६ वर्षीय खामेनी सन् १९८९ देखि इरानका सर्वोच्च नेता छन्। इस्लामिक गणतन्त्र इरानका संस्थापक रुहोल्लाह खोमेनीको निधनपछि उनी उक्त पदमा नियुक्त भएका थिए। इरानको राजनीतिक तथा धार्मिक निर्णय प्रक्रियामा सर्वोच्च नेताको निर्णय अन्तिम मानिन्छ। खामेनीको मृत्युबारे आधिकारिक तथा स्वतन्त्र पुष्टि भने हालसम्म सार्वजनिक भएको छैन।