व्यास नगरपालिकामा आपत्कालीन केन्द्र सञ्चालन
व्यास नगर प्रमुख वैकुण्ठ न्यौपानेका अनुसार, केन्द्रले विपद्को जोखिम न्यूनीकरण गर्दै प्राकृतिक र मानवजन्य प्रकोपले जनधनमा पर्ने क्षति न्यून गर्न भूमिका खेल्नेछ।
Mayorsap
शुक्र, भदौ २१, २०८१ | ०८:०९ बजे
व्यास नगरपालिकाले आपत्कालीन केन्द्र सञ्चालनमा ल्याएको छ। उक्त केन्द्रमा एम्बुलेन्स, दमकल, शव वाहन, डोजर, ब्याक लोडर, फायर सिलिन्डर लगायतका उद्धार तथा राहत सामग्री तयारी अवस्थामा राखिएको छ। नगरपालिकाले विपद् व्यवस्थापन र आपत्कालीन सेवाहरूको सहज उपलब्धताका लागि यो केन्द्र सञ्चालनमा ल्याएको हो।
व्यास नगर प्रमुख वैकुण्ठ न्यौपानेका अनुसार, केन्द्रले विपद्को जोखिम न्यूनीकरण गर्दै प्राकृतिक र मानवजन्य प्रकोपले जनधनमा पर्ने क्षति न्यून गर्न भूमिका खेल्नेछ। यस केन्द्रले खोज, उद्धार, प्राथमिक उपचार र क्षतिको लेखाजोखा लगायतका सेवा २४ घण्टा उपलब्ध गराउनेछ।
केन्द्रलाई थप प्रभावकारी बनाउन सात लाख रुपैयाँको नयाँ सामग्री खरिद गरिएको छ, र बाढी पहिरो तथा आगलागी जस्ता आपतकालीन अवस्थाहरूमा काम गर्न कर्मचारी र आवश्यक साधन तयारी अवस्थामा राखिएको छ।
सञ्चालन गरिएको यो केन्द्रले नेपाली सेना, सशस्त्र प्रहरी र नेपाल प्रहरीसँग सहकार्य गर्दै नगरभित्रको विपद् व्यवस्थापनमा महत्वपूर्ण भूमिका खेल्ने अपेक्षा गरिएको छ।