काठमाडौं । देशभरका अधिकांश स्थानीय तहको वेबसाइटमा समस्या आएको छ । केही पालिकाको वेबसाइट बाहेक अधिकांश वेबसाइटमा समस्या देखिएको छ । प्राविधिक कारण देखाउँदै स्थानीय तहका वेबसाइट चलेका छैनन् । ‘यस वेबसाइटको मर्मत कार्य जारी छ। हामी एकछिन पछि फर्कने छौं,’ गाउँपालिकाहरूको वेबसाइटमा यस्तो भनिएको छ ।

केही पालिकाको आजबाट नचलेको हो भने केहीको हिजैदेखि वेबसाइट डाउन छ। वेबसाइट नचल्दा स्थानीय तहहरूले प्रकाशित गर्ने सूचना, जानकारीसहित विभिन्न प्रशासनिक र सामाजिक सुरक्षाको सेवाहरूसमेत असर परेको छ ।

‘के कारणले साइट नचलेको हो भनेर प्राविधिक चेकजाँच भइरहेको संघीय मामिला तथा सामान्य प्रशासन मन्त्रालयले जनाएको छ । छिट्टै समस्या समाधान गर्न मन्त्रालयको प्राविधिक टोली खटिरहेको मन्त्रालयका प्रवक्ता कालीप्रसाद पराजुलीले जानकारी दिए ।