धनकुटा । धनकुटाको पाख्रिबासमा ३ वटा सुँगुर लोड गरिएको पिकअप दुर्घटना हुँदा २ जनाको मृत्यु भएको छ। पाख्रिबास नगरपालिका ३ स्थित पाख्रिबास–हिले सडकखण्डको जौटारमा बिहीबार राति करिब ९ बजे को १ ज २६३९ नम्बरको पिकअप सडकबाट करिब १५० मिटर तल खसेर दुर्घटना भएको हो। मृत्यु हुनेमा चालक पाख्रिबास ९ उत्तरपानीका का ३९ वर्षिया शुक्र बहादुर तामाङ र सहचालक सिरहाको लाहान ५ का  २४ वर्षिया प्रमोद मल्लिक रहेका छन्।

सहचालक मल्लिकको दुर्घटनास्थलमै मृत्यु भएको र चालक तामाङलाई जिल्ला अस्पताल पु¥याए लगतै चिकित्सकले मृत घोषणा गरेको जिल्ला प्रहरी कार्यालय धनकुटाका प्रवक्ता डीएसपी ओम प्रकाश खनालले जानकारी दिए। मृतकहरुको शव पोष्टमार्टमका लागि जिल्ला अस्पताल धनकुटामा राखिएको छ। दुर्घटनामा ३ वटै सुँगुर भने जिवितै रहेको प्रहरीले जनाएको छ ।