काठमाडौं । धरान उपमहानगरपालिकाका मेयर हर्क साम्पाङ खानेपानीको व्यवस्था गर्न माग गर्दै खाली गाग्री बोकेर काठमाडौं आइपुगेका छन् । उनी खानेपानीमन्त्री प्रदीप यादव र प्रधानमन्त्री केपी शर्मा ओलीलाई भेट्न रित्तो गाग्री बोकेर सोमबार काठमाडौं आएका हुन् । उनी रित्तो गाग्रीसहित मंगलबार मन्त्री र प्रधानमन्त्रीलाई भेट्न सिंहदरबार जाँदैछन् । 

संघीय सरकारले धरानको खानेपानी समस्या समाधान नगरेको भन्दै मेयर साम्पाङ रुष्ट छन् । धरानमा पानीको चर्को अभाव भएकाले सप्तकोशीको पानी ल्याउने भनिए पनि पर्याप्त बजेट नहुँदा समस्या भएको छ ।

उनले तत्कालका लागि अहिले कोकाहा खोलाको पानी ल्याएका छन् । चुनावका बेला धरानमा खानेपानीको व्यवस्था गर्ने उनको पहिलो शर्त थियो । यसका लागि विभिन्न प्रयासहरु गर्दै पनि आएका छन् ।