काठमाडौं । सहकारीको डेढ अर्ब रकम हिनामिना गरेको आरोपमा पक्राउ परेका म्याग्दीका जिल्ला समन्वय समितिका प्रमुख राजकुमार थापाविरुद्ध तीन दिन म्याद थप भएको छ । जिल्ला अदालत म्याग्दीले थापाविरुद्ध अनुसन्धानका लागि तीन दिन म्याद थप गरेको हो । अदालतले तीन दिन हिरासतमा राखेर अनुसन्धान गर्न अनुमति दिएको प्युठान प्रहरीले जानकारी दिएको छ ।

म्याग्दीको कुमारी बहुउद्देश्यीय सहकारी संस्थाको डेढ अर्ब रकम हिनामिना गरेको आरोपमा आइतबार प्रमुख थापासहित पाँच जनालाई पक्राउ गरेको हो । पक्राउ पर्नेहरुमा मन प्रसाद थजाली, रुद्र बहादुर गुरुङ, थम बहादुर गर्वुजा र देवी कुमारी थापा रहेका छन् । 

उनीहरूमाथि थप अनुसन्धान भइरहेको प्रहरीले जनाएको छ । गत वर्ष नै सहकारी हिनामिनाका मुख्य योजनाकार रहेको आरोपसहितको प्रतिवेदन प्रहरीले बुझाएको थियो । सहकारीको रकम सञ्चालकले ढुकुटी खेलाउने, निजी स्कुल र घरजग्गामा लगाउनेजस्ता व्यक्तिगत स्वार्थमा प्रयोग गरेको उक्त प्रतिवेदनमा उल्लेख छ ।