काठमाडौं । क्यानडाका प्रधानमन्त्री जस्टिन ट्रुडोले अमेरिकी राष्ट्रपति डोनाल्ड ट्रम्पले क्यानडामाथि लगाइएको कर मुर्खतापूर्ण कार्य भएको बताएका छन् । उनले अमेरिकाले लगाएको करको जवाफ क्यानडाले तुरुन्तै दिने बताएका छन्। 

ट्रम्पले क्यानडाविरुद्ध व्यापार युद्ध गरेर रुसलाई सहयोग गरेको उनको आरोप छ । आफ्नो कार्यकालको अन्तिम समयमा रहेका ट्रूडोले भने, हामी अमेरिकाबाट हुने ३० अर्ब क्यानेडियन डलरको आयातमा तत्काल २५ प्रतिशत भन्सार शुल्क लगाउँदैछौं र आवश्यक परेमा आगामी २१ दिनमा थप १२५ अर्ब क्यानेडियन डलरको आयातमा भन्सार शुल्क लगाउनेछौं । यद्यपि, यी सबै शुल्कहरूको लागि निश्चित रूपमा कुनै उचित कारण छैन ।

ट्रुडोले अमेरिका–मेक्सिको–क्यानाडा व्यापार सम्झौताको कुनै पनि उल्लङ्घनलाई क्यानडाले विश्व व्यापार संगठनमा चुनौती दिने पनि बताए । उनले अमेरिकाले आफ्नो निकटतम साझेदार क्यानडाविरुद्ध व्यापार युद्ध छेडेको बताउदै ट्रम्पले रूसका तानासाह भ्लादिमिर पुटिनलाई खुसी पार्ने प्रयास गरिरहेको आरोप लगाए । ट्रुडोले सिधै ट्रम्पको नाम लिएर यो मुर्खतापूर्ण कार्य भएको बताए ।

ट्रम्पले अमेरिकाका तीन ठूला व्यापारिक साझेदारहरू विरुद्ध शुल्क लगाएका छन् । त्यसपछि मेक्सिको, क्यानडा र चीनले तुरुन्तै बदला लिए र वित्तीय बजारमा अशान्ति सिर्जना भएको छ । ट्रम्पले मेक्सिकन र क्यानेडियन आयातमा २५ प्रतिशत कर लगाएका छन् । यद्यपि उनले क्यानेडियन ऊर्जामा कर १० प्रतिशत कर लगाएका छन् ।

ट्रुडोले क्यानडाले यो व्यापार युद्ध नचाहेको तर ट्रम्पले यो विकल्प रोजेको स्पष्ट गरेका छन् । ​​​​​​​ट्रुडोले ट्रम्पले बारम्बार उनको लक्ष्य क्यानडाको अर्थतन्त्रलाई हानि पुर्‍याउनु रहेको बताएको उल्लेख गर्दै उनले क्यानडालाई आफ्नो अधीनमा राख्न खोजेको आरोप लगाए ।

क्यानडाको सबैभन्दा बढी जनसंख्या भएको प्रान्त ओन्टारियोका प्रिमियर डग फोर्डले अमेरिकामा हुने बिजुली निर्यातमा २५ प्रतिशतले कटौती गर्ने र यदि कर जारी रहेमा पूर्ण रूपमा रोक्न सक्ने बताएका छन् । उनले अमेरिकालाई निकेल र दुर्लभ खनिजहरूको बिक्री रोक्न सक्ने पनि बताएका छन् । यसको अतिरिक्त, ओन्टारियो र अन्य प्रान्तहरूले अमेरिकी रक्सी ब्रान्डहरू हटाउन थालेका छन् ।