डीबी विष्ट/बझाङ । गृहमन्त्री रमेश लेखकले पूर्व राजा ज्ञानेन्द्र शाहलाई नजरबन्दमा राख्ने बारे कुनै योजना नरहेको बताएका छन् । फागुन २५ गते राप्रपाले त्रिभुवन अन्तराष्ट्रिय विमानस्थलमा पूर्व राजालाई स्वागत गर्ने कार्यक्रम राखेको र त्यसअगावै ज्ञानेन्द्र शाहलाई नजरबन्दमा राख्ने चर्चाबारे प्रष्ट पार्दै उनले त्यसबारे केही नसोचेको बताएका हुन् । 

नेपाल पत्रकार महासंघ जिल्ला शाखा बझाङले आयोजना गरेको पत्रकार सम्मेलनमा बोल्दै गृहमन्त्री लेखकले लोकतन्त्रका विरुद्धमा षडयन्त्र गर्ने कोसिस भइरहेको भन्दै लोकतन्त्रको विकल्प लोकतन्त्र नै भएको बताए ।   

‘गणतन्त्रको विकल्पको रुपमा राजतन्त्र हुन सक्दैन । उनले भने, ‘यो भ्रममा पूर्व राजा लगायत कसैले पनि नबसे हुन्छ । उनले समाज अगाडि बढीसकेपछि पछाडि फर्किन नसक्ने बताए । ‘लोकतन्त्र, गणतन्त्र र संघीयतामा गइसकेको समाज अब फर्केर कुनै पनि निरंकुशतातिर जाँदैन । 

समावेशी चरित्रको राज्य व्यवस्थाका विरुद्धमा षडयन्त्र गर्ने प्रयत्न भइरहेको बताउँदै उनले ती षडयन्त्र कुनै हालतमा सफल नहुने दाबी गरे । उनले राजतन्त्रको पक्षमा जनलहर छ भनेर भ्रम फैलाउन खोजिएको बताउँदै त्यस्तो नभएको बताए । ‘यो व्यवस्थाका विरुद्धमा षडयन्त्र हुन सक्छन् । तर राजतन्त्रको पक्षमा जनलहर छ भन्ने कुरा साँचो नभएको उनले बताए ।