काठमाडौं । काठमाडौंको चन्द्रागिरिमा एक व्यक्तिले आत्मदाहको प्रयास गरेका छन् । गएराति साढे १२ बजेतिर चन्द्रागिरि नगरपालिका–७ घर भएका उत्तम कार्कीले फेसबुक पेजमा लाइभ गरी आफ्नै शरीरमा पेट्रोल छर्केर आगो लगाएका हुन् ।  घटना थाहा पाएपछि पुगेको प्रहरीले उनलाई उद्धार गरी अस्पताल पुर्‍याएको हो । उनको कीर्तिपुरको बर्न अस्पतालमा उपचार भइरहेको काठमाडौं प्रहरी परिसर प्रवक्ता अपिल बोहराले जानकारी दिए । उनको हात र अनुहार जलेको छ ।

उनले फेसबुक लाइभमा स्थानीय एकजना महिलाले लगातार उजुरी गरेर तनाव दिएको हुनाले आफू बाँच्न नसक्ने अवस्थामा पुगेको उल्लेख गरेका छन् । उनले भनेका छन्, ‘मलाई पटक–पटक दबाब दिइएको छ, मेरो कुरा कुनै पनि निकायले सुनेनन् ।’  उनकै कारण आफू पक्राउ परेको, पारिवारिक सम्बन्ध बिथोलिएको र यी सबै कारणले कान नसुन्ने बुवा र आँखा नदेख्ने आमाले दुःख पाएको भन्दै अब बाँच्न नसक्ने बताएका थिए ।

आर्थिक व्यवहार बिग्रिएपछि आफूले दुर्व्यवहार नगरेपनि एकजना महिलाले आफूलाई पटक पटक तनाव दिएर ‘बाँच्न नसक्ने अवस्था’मा पुर्‍याएको कार्कीले बताएका छन् । उनले भनेका छन्, ‘देशमा न्याय मरेको रहेछ, मलाई बलात्कारको मुद्दा हालेर सन्दीप लामिछाने र पल शाह बनाउने धम्की आएपछि यो निर्णय लिन बाध्य भएँ ।’ ती युवतीको उजुरीको आधारमा यसअघि १८ दिन हिरासतमा बसेको र अभद्र व्यवहार मुद्दा खेपेको उनले बताएका छन् ।