काठमाडौं । गएको तीन महिनादेखि तलब नपाएका कर्मचारीहरुलाई तलब उपलब्ध गराउनेभन्दा कार्यालय सम्हाल्न काठमाडौं महानगरपालिका पुगेका प्रमुख प्रशासकीय अधिकृत सरोज गुरागाईँलाई मेयर बोलेन्द्र साहले नगर प्रहरी परिचालन गरेर कार्यालयभित्र प्रवेश गर्न रोकेका छन् ।

मेयर बालेन्द्र साहले गुरागाईँलाई रोक्नका लागि उनको कार्यकक्षमा ताला लगाएर नगर प्रहरी उतारेका छन भने उपमेयर सुनिता डंगोल भने गुरागाईँको स्वागतका लागि तयार भएर बसेकी छिन् ।

गुरागाईँको स्वागत र निषेधको अवस्था महानगरपालिका कार्यालयमा रहदाँ स्थिति असमान्य बनेको छ । उपमेयर डंगोलसहित कर्मचारीहरूले मेयर साहको आदेशमा लगाएको ताला फोडने प्रयास गरे ।
 

मेयर बालेनले काठमाडौं टावर निर्माणको विषयलाई लिएर गएको तीन महिनाअघिदेखि नै प्रमुख प्रशासकीय गुरागाईँलाई कार्यालय छिर्न बन्देज लगाएका थिए । त्यसपछि मेयर बालेनले गुरागाईँको विषयमा छानबिन समिति बनाएर अनुसन्धान अगाडि बढाएका थिए । तर अनुसन्धान निष्कर्षमा पुग्न सकेको थिएन् ।

आज बिहीवार गुरागाईँ महानगरको कार्यालयमा जिम्मेवारी सम्हाल्नेगरी छिर्न खोजेका थिए । तर बालेनले गुरागाईँ आएको जानकारी पाएपछि नगर प्रहरी तैनाथ गरी गुरागाईँलाई कार्यालय प्रवेशमा रोक लगाएका छन् । महानगरमा कार्यरत कर्मचारीहरुसमेत गुरागाईँलाई कार्यालय प्रवेशमा सहयोग गर्न आएको देखिन्थ्यो । तर नगर प्रहरीले उनीहरुलाई कार्यालय प्रवेशमा रोक लगाए ।

केही कर्मचारीहरुले मेयर बालेनले समस्या पनि समाधान नगरेको र तलब पनि उपलब्ध नगराएको भन्दै तलब उपलब्ध गराउन माग गरेका थिए । मेयर बालेनले संघीय सरकारलाई गुरागाईँको सट्टामा नयाँ प्रमुख प्रशासकीय अधिकारी पठाइदिन अनुरोध गरिरहेको छ भने संघीय सरकार नयाँ प्रमुख प्रशासकीय अधिर्कत पठाउन तयार नभएको देखिन्छ ।

दुई राजनीतिक पक्षबीचको विवादले कामनपाका कर्मचारीहरुले तलब सुविधा पाएका छैनन् ।