जनकपुरधाम । जनकपुरधाम उपमहानगरपालिकामा निर्माण गरिएको धर्मशाला भवनको उद्घाटन गरिएको छ । मधेस प्रदेश सरकारका मुख्यमन्त्री सतिशकुमार सिंहले मिथिला सांस्कृतिक संरक्षण परिषद् जनकपुरधामले निर्माण गरेको भवनको आज (शनिबार) उद्घाटन गरेका हुन् ।

हनुमान् जयन्तीका अवसरमा मिथिला अबध सांस्कृतिक संरक्षण परिषद् जनकपुरधामद्वारा आयोजित समारोहमा मुख्यमन्त्री सिंहले भवनको उद्घाटन गरेका छन् । २२ कट्ठा जमिनमा २० करोडको लागतमा पाँचतलाको भवन निर्माण गरिएको छ ।

नेपाल तथा भारतका विभिन्न सामाजिक सङ्घसंस्था र धार्मिक तथा सामाजिक व्यक्तित्वको आर्थिक सहयोगमा निर्माण भएको धर्मशाला हाताभित्र सभा भवन, शौचालय तथा पक्की भान्साघर र पार्किङको समेत व्यवस्था गरिएको छ ।

उद्घाटन कार्यक्रममा मुख्यमन्त्री सिंहले ऐतिहासिक, धार्मिक तथा सांस्कृतिक रुपमा ख्याति प्राप्त तथा सीता माताको जन्मभूमिस्थल जनकपुरधामको राष्ट्रिय तथा अन्तराष्ट्रिय क्षेत्रमा प्रचारप्रसार गरी धार्मिक पर्यटनको आकर्षण बढाउनुपन सबैलाई आग्रह गरे । साथै उनले जनकपुरधाममा आउने पर्यटक तथा हिन्दू धर्मावलम्बीलाई गुणस्तरीय सेवा प्रदान गर्ने किसिमको वातावरण बनाउन पनि अपिल गरे ।