काठमाडौं । नेपाली कांग्रेसका नेता एवं गृहमन्त्री रमेश लेखकले सत्ता गठबन्धनमा कुनै समस्या नभएको बताएका छन् । बुधबार साँझ प्रधानमन्त्रीको सरकारी निवास बालुवाटारमा बसेको उच्चस्तरीय राजनीतिक संयन्त्रको बैठकपछि सञ्चारकर्मीसँग बोल्ने क्रममा गृहमन्त्री लेखकले सरकारमा कुनै समस्या नरहेको प्रष्टीकरण दिए ।

‘हाम्रो बीचमा कुनै समस्या छैन । बाहिर आएका कुरा असत्य हो । दुई नेतासहित बसेका छौं ।’ गभर्नरबारे सिफारिसबारे समितिले प्रक्रिया अघि बढेर छिट्टै टुंग्याउने उनले जानकारी दिए । शिक्षकको आन्दोलनबारे लेखकले आउने अधिवेशनबाट शिक्षा विधेयक टुंग्याइने दाबी गरे ।

‘यो अधिवेशन त्यो विधेयक पारित गर्ने गरी बोलाइएको हो । शिक्षकरूले त्यहीअनुसार लिनुपर्छ’, उनले भने, ‘मन्त्रिपरिषद् बैठकले नै शिक्षकहरूको आन्दोलनलाई सम्बोधन गरेको छ । थप संवाद पनि गरिरहेका छौं ।’