युद्धविरामपछि पनि भारतको अमृतसर अझै ‘रेड अलर्ट’मा
Mayorsap | १ हप्ता अगाडि 
काठमाडौं । भारत र पाकिस्तानबीच युद्धविराम सम्झौता भए पनि भारतीय राज्य पन्जाबको अमृतसर जिल्ला अझै ‘रेड अलर्ट’मा छ। अमृतसरमा बिजुली नियमित गरिएको छ । तर जिल्ला अझै पनि रेड अलर्टमा छ ।
त्यहाँ अझै मानिसहरूलाई घरबाट बाहिर ननिस्कन र झ्यालबाट टाढा रहन भनिएको बीबीसी हिन्दीले जनाएको छ । गएराति अमृतसरमा ठूलो साइरन सुनिएपछि डिप्टी कमिश्नर साक्षी साहनीले आइतबार बिहानै एक एडभाइजरी जारी गरेकी छन् ।
जसमा भनिएको छ, ‘अवस्था पूर्ण रूपमा सुरक्षित भएपछि प्रशासनले हरियो संकेत दिनेछ। कृपया नआत्तिनुहोस्, शान्ति कायम राख्नुहोस् र प्रशासनका सबै निर्देशन पालना गर्नुहोस् ।’ चार दिनदेखि ड्रोन हानाहान गरिरहेका भारत र पाकिस्तानबीच शनिबार (१० मे) साँझ युद्धविराम गर्ने सहमति भएको हो ।
युद्धविरामपछि पनि पाकिस्तानले सीमा क्षेत्रमा आक्रमण गरिरहेको आरोप भारतले लगाइरहेको छ। तर पाकिस्तानले यो कुरा अस्वीकार गरेको छ ।
