हिन्दू राष्ट्र र राजतन्त्रको बहस गर्नु भन्दा सुशासनतर्फ सबैको ध्यान जानुपर्छ : शेखर कोइराला

Mayorsap | ४ घण्टा अगाडि

मोरङ । नेपाली कांग्रेसका नेता डा शेखर कोइरालाले उच्चपदस्थ कर्मचारीहरूलाई दुई वर्ष ‘कुलिङ पिरियड’मा राख्ने व्यवस्था गरिनुपर्नेमा जोड दिएका छन् । विराटनगर विमानस्थलमा आज सञ्चारकर्मीसँग कुरा गर्दै उनले यस्तो बताएका हुन् । एक अर्को विषयमा नेता कोइरालाले हिन्दू राष्ट्र तथा राजतन्त्रको बहस गर्नुको साटो मुलुकमा सुशासन कायम गरी आर्थिक समृद्धि ल्याउनेतर्फ लाग्न सबैको ध्यान जानु आवश्यक भएको विचार राखे । 

यसैगरी उनले पार्टीको महाधिवेशन तोकिएकै समयमा गराउन आमपार्टी कार्यकर्ताले दबाब दिनुपर्नेमा जोड दिए । नेता डा कोइरालाले हाल चर्चामा रहेको अध्यागमन ‘भिजिट भिसा’ प्रकरणमा गृहमन्त्रीको नाम जोडिएको कुरा बाहिर आएकाले यस विषयमा आफूलाई निष्पक्ष देखाउन पनि मन्त्री रमेश लेखकले छानबिन समिति बनाएर सत्यतथ्य सार्वजनिक गर्नुपर्ने बताए । त्यतिञ्जेल पदबाट राजीनामा दिए राम्रो सन्देश जाने उनको जिकिर थियो ।