म्याग्दीको हिस्तान औलामा घराम्दी खानेपानी योजना निर्माण, १ सय १५ घर लाभान्वित
मेयरसाप डेस्क | ८ घण्टा अगाडि 
म्याग्दी । म्याग्दीको अन्नपूर्ण गाउँपालिका–७ हिस्तान औलामा ‘एक घर, एक धारा’सहितको खानेपानी सुविधा विस्तार भएको छ । खानेपानी, जलस्रोत तथा सिँचाइ डिभिजन कार्यालय म्याग्दीमार्फत सञ्चालित घराम्दी खानेपानी योजनामार्फत औलाका ११५ घरपरिवारका करिब ७०० जनसङ्ख्या लाभान्वित भएका छन् ।
उपभोक्ता समितिका अध्यक्ष डिलप्रसाद फगामीले गण्डकी प्रदेश सरकारको रु ८३ लाख चार हजार ५६९ अनुदान र उपभोक्ताको रु १० लाख २२ हजार ६२१ को लागतमा योजना निर्माण भएको जानकारी दिए । रू एक करोड २९ लाख ३२ हजार ६२१ लागत अनुमान गरिएको योजना उपभोक्ता समितिमार्फत कार्यान्वयन गर्दा कम खर्चमा सम्पन्न भएको उनले बताए।
रिमा गाउँको फेदीमा रहेको कोलालीवाङ मुहानदेखि तीन किलोमिटर ५०० मिटर लामो पाइपलाइनबाट ल्याएको पानी ३५, २० र १० घनमिटर क्षमताको तीन वटा टङ्कीबाट वितरणको व्यवस्था मिलाइएको छ ।
सबै उपभोक्ताको घरघरमा मिटरसहितको धारा जडान गरेर खानेपानी वितरण गरिएको छ । यहाँका बासिन्दाले यसअघि सार्वजनिक धाराबाट पानी उपभोग गर्दथे । सार्वजनिक धाराबाट पानी ओसार्दा हुने समय बचत र झञ्झट हटेको छ । पानीका लागि पालो पर्खनुपर्ने समस्या अन्य भएको छ ।
पानीको मितव्ययी प्रयोगका लागि मिटर जडान र दिगो सञ्चालन गर्न न्यूनतम शूल्क निर्धारण गरिएको उपभोक्ता समितिका अध्यक्ष फगामीले बताए । आर्थिक वर्ष २०७९/०८० मा सुरु भएको योजना चालु आर्थिक वर्षमा सम्पन्न भएको हो । शाखा पाइपलाइन खन्ने र पुर्ने काम उपभोक्ताले श्रमदानमार्फत गरेका छन् ।
छ सयभन्दा बढी घरपरिवारको बसोबास रहेको साविक हिस्तान गाविसको औलासहित सबै बस्तीमा एक घर एक धारा खानेपानी सुविधा पुगेको वडाध्यक्ष मइलन पुर्जा पुनले बताए।
सङ्घीय व्यवस्था सुरु हुनुअघि विसं २०७३ देखि निर्माण थालिएको घराम्दी खानेपानी योजनाले यसपाली पूर्णता पाएको हो । योजनामार्फत यसअघि घराम्दी, टिकोट, रिमा टोलमा एक घर, एक धारासहितको खानेपानी सुविधा विस्तार भएको थियो ।
