मनसुन थप सक्रिय, सुर्खेतमा मुसल्धारे वर्षा

मेयरसाप डेस्क

काठमाडौं । पछिल्ला केही दिनदेखि नेपालमा मनसुन थप सक्रिय भएको छ । यस क्रममा पछिल्लो २४ घण्टामा सुर्खेतमा अत्यधिक वर्षा भएको छ ।

जल तथा मौसम विज्ञान विभागका अनुसार, सुर्खेतको खानीखोला वर्षामापन केन्द्रमा २९२.३ मिलिमिटर अर्थात् मुसल्धारे वर्षा रेकर्ड भएको छ ।

विभागको मौसम पूर्वानुमान महाशाखाकी वरिष्ठ मौसमविद् प्रतिभा मानन्धरका अनुसार, न्यूनचापीय प्रणाली सक्रिय रहेकाले पश्चिमका निश्चित क्षेत्रमा बढी वर्षा भएको हो ।

यसैगरी, पर्वतको पञ्चासेमा १७९.३ मिलिमिटर, बाँकेमा १४६.३ मिलिमिटर, दाङमा १३८ मिलिमिटर, दार्चुलामा १०७ मिलिमिटर र सिन्धुपाल्चोकमा १०५ मिलिमिटर वर्षा मापन भएको छ ।

विभागका अनुसार आज दिउँसो र साँझसम्म वर्षा अझ बढी हुने सम्भावना छ भने भोलिबाट कम हुँदै जानेछ । हाल कोशी, गण्डकी, कर्णाली र सुदूरपश्चिम प्रदेशमा मनसुनको बढी प्रभाव रहेको छ ।