मुगुमा ‘छायाँनाथ राष्ट्रिय निकुञ्ज’ स्थापना गर्ने सरकारको निर्णय

मेयरसाप डेस्क

काठमाडौं । सरकारले मुगुको मुगुम कार्मारोङ गाउँपालिकामा ‘छायाँनाथ राष्ट्रिय निकुञ्ज’ स्थापना गर्ने निर्णय गरेको छ ।

आज बसेको मन्त्रिपरिषद् बैठकले वन तथा वातावरण मन्त्रालयको प्रस्तावमा यो निर्णय गरेको हो । यो निकुञ्ज नेपालको १३ औँ राष्ट्रिय निकुञ्ज हुनेछ ।

वनमन्त्री ऐनबहादुर शाही ठकुरीको पहलमा स्थापना गरिएको यो निकुञ्ज शे–फोक्सुन्डो राष्ट्रिय निकुञ्जसँग जोडिएको मुगुम कार्मारोङ गाउँपालिकाको डोल्फु क्षेत्रको ९०६ वर्ग किलोमिटर भूभागलाई अलग गरेर बनाइएको हो ।

मन्त्री शाहीका अनुसार, डोल्फु क्षेत्रका स्थानीयवासीहरूलाई शे–फोक्सुन्डो निकुञ्जमा जान आउन एक साताको समय लाग्ने गरेकोले उनीहरूको समस्यालाई सम्बोधन गर्न यो पहल गरिएको हो । 

यसले स्थानीय बासिन्दालाई राहत दिने विश्वास गरिएको छ । मुगुमा २०३२ सालमा रारा राष्ट्रिय निकुञ्ज स्थापना भएको झन्डै ५० वर्षपछि दोस्रो राष्ट्रिय निकुञ्ज स्थापना भएको हो ।