आर्यघाटमा श*वको हड्डी किनबेच गर्ने ४ जना धरौटीमा रिहा

मेयरसाप डेस्क

काठमाडौं । पशुपति आर्यघाटमा जलाउँदै गरेको शवको हड्डी निकालेर किनबेच गरेको आरोपमा पक्राउ परेका चार जनालाई अदालतले धरौटीमा रिहा गर्ने आदेश दिएको छ ।

काठमाडौं जिल्ला अदालतका न्यायाधीश ईश्वरीप्रसाद भण्डारीको इजलासले उनीहरूलाई जनही १० हजार रुपैयाँ धरौटीमा रिहा गर्न आदेश दिएको हो ।

धरौटीमा रिहा हुनेहरूमा रामनन्दन ठाकुर, जीवनाथ ढकाल, विनायक मैनाली र मिश्रीलाल यादव रहेका छन् ।

उनीहरूलाई मुलुकी फौजदारी अपराध संहिताको धर्मसम्बन्धी कसुरमा मुद्दा चलाइएको थियो । उनीहरूले साउन २३ गते राम शाही नामका व्यक्तिको शव जलाउने क्रममा टाउकाको हड्डी निकालेर बेचेको आरोप लागेको थियो ।

आर्यघाट सेवा केन्द्रबाट खटिएका जीवनाथ ढकाल र उनका सहयोगी विनायक मैनालीले हड्डी निकालेर रामनन्दन ठाकुर र मिश्रीलाल यादवलाई दिएको बताइएको छ ।