सञ्चारमाध्यममा महिला र सिमान्तकृत समुदायको भौतिक सहभागिता हुनुपर्नेमा अधिकारकर्मीहरुको जोड

मेयरसाप डेस्क

काठमाडौं । अधिकारकर्मी तथा सञ्चारकर्मीहरुले आमसञ्चारमाध्यममा महिला र सिमान्तकृत समुदायको भौतिक सहभागिता हुनुपर्ने माग गरेका छन् । पर्पल फाउण्डेशनले यहाँ आज आयोजना गरेको ‘राजनीतिमा समावेशी सहभागिता र नेतृत्वका लागि सञ्चारकर्मीको भूमिका’ विषयक अन्तरक्रियामा उनीहरुले सञ्चारमाध्यमका विषयवस्तुमा पनि समावेशीता झल्कनुपर्ने धारणा राखेका हुन्।

दलित अधिकारकर्मी भक्त विश्वकर्माले सरकारी सञ्चारमाध्यमले संविधानको मर्मअनुरुप सिमान्तकृत समुदायको सहभागिता र विषयवस्तुलाई प्राथमिकता दिनुपर्नेमा धारणा राखे । उनले भने, “महिला तथा सिमान्तकृत समुदायको विषयवस्तु सम्प्रेषण गर्ने सवालमा सरकारी र निजी सरकारी सञ्चारमाध्यमले आन्तरिक नीति बनाएर कार्यान्वयन गर्नुपर्छ ।”

पर्पल फाउण्डेशनले गरेको एक अध्ययनअुनसार राष्ट्रिय स्तरका पत्रिकामा महिला (तथा सिमान्तकृत, अल्पसङ्ख्यक) नेताहरुसँग सम्बन्धित समाचार १५ प्रतिशत रहेको छ । उक्त अध्ययनले सङ्घीय स्तरका नेताहरुको समाचार समेटिए पनि प्रदेश र स्थानीय स्तरका नेताहरुको समाचार भने शून्य अभिलेख रहेको पनि देखाएको छ ।

पत्रकार तथा लेखक घनश्याम खड्काले विगतको तुलनामा आमसञ्चारमाध्यमले महिला र सिमान्तकृत समुदायको विषय उठाउने गरेपनि उनीहरुको समस्या, विभेद र पीडाका हिसावले पर्याप्त रुपमा नउठाएको टिप्पणी गरे ।