आत्मालोचना गर्दै प्रचण्ड भन्छन्–हामीले गलत विचार वा नीति लिएका होइनौं तर व्यवहारमा चुक्यौँ

‘अन्तरिम सरकारलाई पनि असफल बनाउने प्रयास शुरु भइसकेको छ’

मेयरसाप डेस्क

काठमाडौं। माओवादी केन्द्रका अध्यक्ष पुष्पकमल दाहाल प्रचण्डले राजनीतिक दलहरुले गलत नीति नलिए पनि व्यवहारमा चुकेको स्वीकार गरेका छन् । 

प्रचण्डले बिहीवार भिडिओ वक्तव्य जारी गर्दै भने, ‘हामीले गलत विचार वा नीति लिएका होइनौं तर व्यवहारमा कतै चुक्यौँ।’

उनले देश र जनताविरुद्धका षड्यन्त्र नसकिएको र अन्तरिम सरकारलाई पनि असफल बनाउने प्रयास शुरु भइसकेको समेत बताए । घोषित निर्वाचन समयमैं सम्पन्न होस् भन्ने चाहेको समेच प्रचण्डको भनाइ छ । 

उनले सरकारको नेतृत्व गर्दा कुनै राष्ट्रघाती सम्झौता नगरेको र भ्रष्टाचारविरुद्ध निरन्तर लडिरहेको दाबी गरे। जनताको अपेक्षासँग तुलना गर्दा आफूहरू कमजोर देखिएको समेत उनले स्वीकार गरेका छन् । प्रचण्डले नेतृत्व हस्तान्तरणको विषयमा पार्टीभित्र छलफल सुरु भइसकेको समेत बताएका छन् । 

संविधान र लोकतान्त्रिक गणतन्त्रप्रति कुनै पनि प्रकारको विचलन देशलाई समाधानतर्फ नभई संकटतर्फ लैजाने चेतावनी दिँदै प्रचण्डले भने, ‘लोकतन्त्रको विकल्प अझ उन्नत लोकतन्त्र हो। संविधान र लोकतन्त्रको रक्षा मार्फत राष्ट्रको स्वतन्त्रताको रक्षा गर्नुपर्छ, यो सबै नेपालीको साझा कर्तव्य हो।’