एक करोड खर्चेर अतिथि आवास निर्माण

मेयरसाप डेस्क

गलकोट । रोजगारीको सिलसिलामा जापान पुगेका बागलुङ, काठेखोला गाउँपालिका–६ बिहुँकोटका बासिन्दाहरू ले आफ्नो जन्मभूमिको धार्मिक स्थलको विकासमा करोडौँको लगानी गरेका छन् । 

उनीहरूकै आर्थिक सहयोगमा बिहुँकोत मन्दिर (कोतघर) मा भक्तजनको सुविधाका लागि दुई पक्की अतिथि आवासगृह निर्माण सम्पन्न भएको छ । 

बिहुँकोट समाज जापान र जापान समाज बिहुँकोटको पहलमा ५१ जना दाताहरूबाट करिब १ करोड रुपैयाँ सङ्कलन गरेर यो संरचना निर्माण गरिएको हो । 

आवासगृह निर्माण संयोजक दीपक कँडेलका अनुसार, तल्लो र उपल्लो दुवै कोतघरमा बनाइएका यी आवासगृहमा एकै पटक २६ जनासम्म भक्तजन बस्न सक्ने क्षमता छ ।

निर्माण सम्पन्न भएका यी दुई अतिथि आवासगृहहरू फूलपातीको दिन एक कार्यक्रमका बीच हस्तान्तरण गरिएको छ । संरक्षक तथा समाजसेवी दीपक सुवेदी ले आवासगृहको उद्घाटन गरेका थिए । उनले बिहुँकोत मन्दिरमा धार्मिक पर्यटक भित्र्याउने सम्भावना देखेर पूर्वाधारमा लगानी गरिएको बताए । 

हालसम्म १ करोड १० लाख रुपैयाँ सङ्कलन भइसकेको र बाँकी रकम अन्य पूर्वाधार निर्माणमा खर्च गरिने संयोजक कँडेलले जानकारी दिए ।

जापान समाज बिहुँकोटका अध्यक्ष नारायणप्रसाद कँडेलले प्रचारप्रसारको अभावमा ओझेलमा परेको बिहुँकोत मन्दिरलाई उजागर गर्न र यहाँ आउने भक्तजनलाई खाना तथा बस्नको व्यवस्थापन गर्न आवासगृह निर्माण गरिएको बताए ।

कँडेलका अनुसार, विगत तीन वर्षदेखि जापानमा बस्ने बिहुँकोटवासीहरू मन्दिरमा शौचालय, तारबार, सडक ढलान, खानेपानी, पदमार्ग र प्रवेशद्वार जस्ता विभिन्न पूर्वाधार निर्माणमा निरन्तर सक्रिय छन् ।