सप्तरीमा अज्ञात समूहद्वारा पुजारीको गोली हानी ह*त्या


काठमाडौं । सप्तरीको बोदेबरसाईन नगरपालिका– ८ रजकपट्टीस्थित कबिर बाबा मन्दिरका पुजारीको गोली हानी हत्या गरिएको छ । गएराति ७० वर्षीय पुजारी राम दुलार साहलाई अज्ञात समूहले गोली प्रहार गर्दा घटनास्थलमै मृत्यु भएको जिल्ला प्रहरी कार्यालय सप्तरीका प्रवक्ता डीएसपी डम्बर पुरीले जानकारी दिए।
प्रहरीका अनुसार साह राति आफ्नै कुटी अगाडि बाटोमा पिसाब फेर्न निस्किएको बेला पछाडिबाट दुई गोली प्रहार गरिएको थियो । पिठ्युमा गोली लाग्दा उनको तत्कालै मृत्यु भएको हो ।
घटना सार्वजनिक भएपछि प्रहरी निरीक्षकको नेतृत्वमा पुगेको टोलीले घटनास्थल सुरक्षित गर्दै अनुसन्धान थालेको छ । घटनास्थलबाट दुई वटा गोलीका खोका बरामद भएको प्रहरीले जनाएको छ।
गोली प्रहार गर्ने व्यक्ति फरार रहेको र खोजीका लागि जिल्ला प्रहरी कार्यालय सप्तरी तथा इलाका प्रहरी कार्यालय कडरवोनाबाट टोली परिचालन गरिएको प्रहरीले जनाएको छ। मृतकको शव पोष्टमार्टमका लागि धरानस्थित बिपी कोइराला स्वास्थ्य विज्ञान प्रतिष्ठान पठाइएको छ।
Facebook Comments