अख्तियारको उपसचिव हुँ भन्दै ध*म्काउने महरा पक्राउ

मेयरसाप डेस्क

काठमाडौं । नेपाल प्रहरीले अख्तियार दुरूपयोग अनुसन्धान आयोगको उपसचिव हुँ भन्दै विभिन्न व्यक्तिलाई धम्काउने एकजनालाई पक्राउ गरेको छ । प्रहरी वृत्त बालाजुको टोलीले काठमाडौंको तारकेश्वर नगरपालिकाका बासिन्दालाई अख्तियार दुरूपयोग अनुसन्धान आयोगको उपसचिव हुँ भन्दै किर्ते कागज गरी धम्काउने डोटी घर भई काठमाडौंको फुटुङ बस्ने ३७ वर्षीय ऐभानबहादुर महरालाई पक्राउ गरी आज सार्वजनिक गरेको हो ।

परिसरका प्रवक्ता, प्रहरी उपरीक्षक पवनकुमार भट्टराईले अख्तियारको कर्मचारी भनी विभिन्न व्यक्तिलाई धम्काउने महरालाई तारकेश्वर नगरपालिका– ९ टुसालचोकबाट पक्राउ गरिएको जानकारी दिए । पक्राउ परेका महरा राष्ट्रिय वाणिज्य बैँकका पूर्व कर्मचारी रहको खुल्न आएको प्रवक्ता भट्टराईले बताए ।

पक्राउ परेका महरासँग प्रहरीले माननीय राज्यमन्त्रीको सचिवालय, प्रधानमन्त्री तथा मन्त्रिपरिषद्को कार्यालय, सिंहदरबार काठमाडौंसमेत लेखिएको लेटरप्याड तीन थान, नेपाल सरकार, प्रधानमन्त्री तथा मन्त्रिपरिषद्को कार्यालय, सिंहदरबार लेखेको लेडरप्याड तीन थान,  नेपाल सरकार उद्योग वाणिज्य तथा आपूर्ति मन्त्रालयसमेत लेखिएको कागज बरामद गरेको छ ।

यस्तै, अङ्कित सेक्युरिटि सर्भिस प्रालि इचङ्गुनारायण काठमाडौं लेखिएको लेटर प्याड एक थान, विभिन्न बैँकको स्टेटमेन्ट र एटिएम, चेकबुक एक थान, विभिन्न हिसाबको रेकर्ड राखिएको डायरी एक थान र राष्ट्रिय वाणिज्य बैंक लिमिटेडको परिचयपत्र बरामद गरेको प्रवक्ता भट्टराईले बताए ।