मेयर गुरुङको मन्त्रालयलाई व्यंग्यात्मक जवाफ–दिनैपिच्छे नयाँ प्रशासकीय अधिकृत पठाए पनि हुन्छ

गाई भैंसी ब्याउन र दाइँ गर्न समस्या छैन

मेयरसाप डेस्क

धनकुटा। पाख्रीबास नगरपालिकाका नगर प्रमुख ज्ञानबहादुर गुरुङले संघीय मामिला तथा सामान्य प्रशासन मन्त्रालयलाई प्रत्येक दिन नयाँ प्रमुख प्रशासकीय अधिकृत पठाए पनि फरक नपर्ने भन्दै पत्र लेखेका छन् ।

मन्त्रालयअन्तर्गतको स्थानीय तह कर्मचारी प्रशासन शाखालाई पत्राचार गर्दै नगर प्रमुख गुरुङले प्रत्येक महिना वा सम्भव भए दिनदिनै छुट्टाछुट्टै प्रमुख प्रशासकीय अधिकृतलाई जिम्मेवारी तोकी पठाउँदा पनि फरक नपर्ने बताएका हुन् ।

नगरपालिकामा प्रमुख प्रशासकीय अधिकृतको बारम्बार हुने सरुवाप्रति असन्तुष्टि जनाउँदै उनले व्यंग्यात्मक शैलीमा मन्त्रालयलाई जवाफ फर्काएका हुन् ।

नगर प्रमुख गुरुङले पत्रमा पाख्रीबास नगरपालिकामा दैनिक प्रशासनिक र आर्थिक कामकाज हुँदा र नहुँदा यस क्षेत्रमा धान फल्न, दाइँ गर्न, थन्क्याउन, बालीनाली लगाउन, गाई भैंसी ब्याउन, दूध उत्पादन गर्न, सिंचाइ गर्न, फलफूल लगाउन, फुल्न र सो को निकासा गरी बिक्री वितरण गर्न कुनै समस्या नरहेको उल्लेख गर्दै प्रमुख प्रशासकीय अधिकृतको हकमा दिनैपिच्छे वा महिनैपिच्छे पठाउँदा पनि हुने उल्लेख गरेका छन् । 

उनले मन्त्रालयलाई पठाएको पत्रको बोधार्थ प्रधानमन्त्री तथा मन्त्रीपरिषदको कार्यालय र नगर कार्यपालिकालाई दिएका छन् ।