थाहा नगरपालिकाको इन्द्रायणी जात्रा: शान्ति र सुरक्षामा नेपाल प्रहरीको अग्रणी भूमिका

दिक्षान्स खड्का

मकवानपुर। मकवानपुरको थाहा नगरपालिकामा हरेक तीन वर्षमा आयोजना हुने इन्द्रायणी जात्रामा विगतका वर्षहरूमा झैँझगडा हुने गरेको इतिहास यसपटक दोहोरिन पाएन। कडा सुरक्षा व्यवस्था र सूक्ष्म समन्वयका कारण यस वर्ष जात्रा पूर्णतः शान्तिपूर्ण रूपमा सम्पन्न भएको छ।

जिल्ला प्रहरी कार्यालय मकवानपुरअन्तर्गत इलाका प्रहरी कार्यालय पालुङले सुरक्षा रणनीति कडा बनाउँदै सम्भावित जोखिम पहिल्यै पहिचान गरी नियन्त्रणका उपाय अपनाएको थियो। परिणामस्वरूप, यसपटक कुनै पनि अप्रिय घटना हुन नदिई जात्रा सभ्य र सुरक्षित वातावरणमा सम्पन्न भयो।

अपराध महाशाखाबाट खटिएर इलाका प्रहरी कार्यालय पालुङ मकवानपुरको कार्यालय प्रमुख प्र.नि. रुक्शा बज्राचार्यको कमाण्डमा प्रहरी टोलीले भीड व्यवस्थापन, संवेदनशील क्षेत्रको निगरानी, गस्ती तथा तत्काल प्रतिक्रिया संयन्त्रलाई प्रभावकारी बनाएको थियो। स्थानीय सरोकारवाला र स्वयंसेवकसँगको सहकार्यले पनि सुरक्षा व्यवस्थापनलाई थप मजबुत बनायो।

यस सफल सुरक्षा कार्यसम्पादनले नेपाल प्रहरीको व्यावसायिकता र तत्परताको स्पष्ट उदाहरण प्रस्तुत गरेको छ। स्थानीयवासी र जात्रा सहभागीहरूले शान्तिपूर्ण वातावरण सुनिश्चित गरिदिएकोमा प्रहरीप्रति विश्वास र प्रशंसा व्यक्त गरेका छन्।

थाहा नगरपालिकामा आयोजित इन्द्रायणी जात्रालाई सुरक्षित बनाउन जिल्ला प्रहरी कार्यालय मकवानपुर तथा इलाका प्रहरी कार्यालय पालुङको संयुक्त प्रयास निर्णायक सावित भएको छ। यसले आगामी ठूला धार्मिक–सांस्कृतिक कार्यक्रमहरूमा पनि शान्ति र सुरक्षा कायम गर्न सकिने सन्देश दिएको छ।