बाजुराको अनाई खोलामा निर्माणाधीन पक्की पुलको भौतिक प्रगति ९० प्रतिशत

मेयरसाप डेस्क

बाजुरा। बाजुराको मार्तडी–कोल्टी सडकखण्डको बडीमालिका नगरपालिका-८ र ७ को बीचमा पर्ने अनाई खोलामा निर्माणधीन पक्की पुलको निर्माण कार्य अन्तिम चरणमा पुगेको छ ।

ठेक्का सम्झौता भएको दुई वर्षभित्र उक्त पक्की पुलको निर्माण कार्य करिब अन्तिम चरणमा पुगेको हो। गत असार मसान्तसम्म पुलको निमार्ण कार्य सम्पन्न गर्ने लक्ष्य राखिए पनि बर्षातको समयमा सामान ढुवानीमा समस्या हुँदा काममा ढिलासुस्ती भएको हो।

२०८० मंसिर २९ गते ठेक्का सम्झौता भएको उक्त पुलको निमार्ण कार्य अहिले करिब ९० प्रतिशत पूरा भएको छ । ५ करोड ३४ लाख १० हजार ९१८ रुपैँया लागतमा आईएस पावर अफ जेभी निर्माण कम्पनीले २०८० मंसिर २९ गते पुल निमार्णको ठेक्का सम्झौता गरेको थियो ।

भौतिक पुर्वाधार विकास मन्त्रालय अन्तर्गतको बजेट मार्फत पुलको निर्माण कार्य भईरहेको छ । अबको तीन महिनामै सम्पूर्ण निमार्ण कार्य सक्ने लक्ष्य राखिएको निर्माण व्यवसायी तारादत्त जोशीले बताए । सामान ढुवानीमा समस्या हुँदा निर्माण कार्यमा केही ढिलाई भएको जोशिको भनाई छ ।

अनाई खोलामा निमार्णाधिन पक्की पुलको निर्माण कार्य करिब अन्तिम चरणमा पुगेको भौतिक पुर्वाधार विकास कार्यालय अछामका प्रमुख जंग बहादुर थापाले बताए । निमार्ण कम्पनीले ठेक्का सम्झौता गरे लगत्तै निमार्ण कार्य सुरु गरेको र अहिले निमार्ण कार्य करिब अन्तिम चरणमा पुर्याएको थापाको भनाई छ ।

पुलको निमार्ण कार्य सम्पन्न भए पश्चातपश्चात सवारीसाधन र यहाँका स्थानीयलाई ठुलो सहजता मिल्ने अपेक्षा लगिएको छ । बर्षातको समयमा सास्ती खेप्दै आएका सवारीसाधन र स्थानीयलाई पुल निर्माणले ठूलो सहजता मिल्ने बडीमालिका ७ का स्थानीय गणेश राज तिमिल्सेनाले बताए ।

अनाई खोलामा निमार्णाधिन पुलले गति लिए पनि यता बाउली खोलामा निमार्णाधिन पुल भने करिब पाँच वर्षदेखि कछुवा तालमा रहेको छ । टिडि आर जुगल कौसिक जेभिले पुल निमार्णको जिम्मा लिएको थियो। पटक–पटक म्याद थप्दा पनि निर्माण कार्य पूरा हुन सकेको छैन्।

२०७९ फागुन १५ भित्र मोटरेबल पक्की पुल निर्माण सक्नेगरी २०७८ कार्तिक १५ गते टिडिआर जुगल कौशिक जेभीले पाँच करोड ५८ लाख ८८ हजार रुपैंयामा सम्झौता गरेर निमार्णको जिम्मा लिएको थियो। पुल निर्माण हुन नसकेर अहिले अस्तव्यस्त अवस्थामा छ। पुल निर्माण कम्पनीलाई सडक डिभिजन अछामले स्पष्टिकरण समेत माग गरेको थियो ।