चम्पादेवीमा ४३ वर्षीय पुरुष मृ*त फेला

मेयरसाप डेस्क

ओखलढुङ्गा । ओखलढुङ्गा जिल्लाको चम्पादेवी गाउँपालिका–८ बिलन्दुमा ४३ वर्षीय पुरुष मृत फेला परेका छन् । धनबहादुर खत्रीको छोरा डाकबहादुर खत्री घर नजिकै बाटोको छेउमा मृतावस्थामा भेटिएका हुन् । आज बिहान करिब ६ः३० बजेको समयमा घरभन्दा अन्दाजी ५० मिटर टाढा मृतावस्थामा खत्रीको शव भेटिएको थियो ।

बाटो हिँड्ने क्रममा स्थानीयवासीले बाटोमा मृतावस्थमा खत्रीको शव भेटेपछि घरमा मृतकको आमालाई खबर गरेका थिए । आमा घटनास्थल पुगी छोराको शवलाई बोकाई घरमा ल्याएकी थिइन् । छोरालाई मृतावस्थामा भेटेर घरमा ल्याएर जनप्रतिनिधि र प्रहरीलाई खबर गरिएको स्थानीयवासीले बताएका छन् ।

प्रहरी चौकी घोराखोरीबाट प्रहरी सहायक निरीक्षक रत्नेश राउत कुर्मीको टोलीले घटनास्थल सुरक्षित गरेको थियो । थप कानुनी प्रक्रिया र आवश्यक अनुसन्धानका लागि इलाका प्रहरी कार्यालय बरुणेश्वर रामपुरबाट प्रहरी निरीक्षक मनिष लुइँटेलको टोली घटनास्थलतर्फ गएको थियो । आवश्यक कानुनी प्रक्रियापश्चात शवलाई परीक्षणका लागि पठाइएको छ । घटनाका विषयमा थप अनुसन्धान भइरहेको जिल्ला प्रहरी कार्यालयले जनाएको छ ।