बैतडीमा एक महिनाभित्र निधन हुने निर्वाचन प्रहरीको संख्या तीन पुग्यो

स्वास्थ्य व्यवस्थामा चुनौती

मेयरसाप डेस्क

बैतडी । बैतडीमा निर्वाचन तयारीको क्रममा कार्यरत निर्वाचन प्रहरीको मृत्युले सुरक्षा र स्वास्थ्य व्यवस्थामा चिन्ता बढाएको छ। सोमबार राति मेलौली नगरपालिका–६ का ३८ वर्षीय राजेन्द्र प्रसाद भट्ट 'युवराज' घरमै बेहोस भएका थिए र उपचारको प्रयासको बाबजुद मध्यराति १२ बजेर ५ मिनेटमा मृत्यु भएको जिल्ला प्रहरी कार्यालय बैतडीले जनाएको छ।

प्रवक्ता सुरज सिंहका अनुसार भट्ट इलाका प्रहरी कार्यालय मेलौलीमा कार्यरत थिए र ड्युटी सकेर घर फर्किएका थिए। उनलाई उपचारका लागि एम्बुलेन्समार्फत केशरपुर प्राथमिक स्वास्थ्य केन्द्र लगिएको थियो। घटनाबारे थप अनुसन्धान भइरहेको प्रहरीले जनाएको छ।

बैतडीमा यसअघि पनि दुई निर्वाचन प्रहरीको मृत्यु भइसकेको छ। फागुन ८ गते दशरथचन्द नगरपालिका–४ का ३८ वर्षीय महादेव वड घरमै बेहोस भएर ढलेका थिए भने गत माघ २० गते दशरथचन्द नगरपालिका–४ का ३२ वर्षीय प्रकाश चन्द तालिम सकेर फर्किने क्रममा भिरबाट लडेर मृत्यु भएका थिए।

यो घटनाले निर्वाचन तयारीमा संलग्न प्रहरी कर्मचारीको स्वास्थ्य सुरक्षा र ड्युटी व्यवस्थापनमा सुधार आवश्यक रहेको देखाएको छ।