ललितपुर महानगरपालिकाले ‘सुन्दर ललितपुर नगरी, घरघरमा नगर प्रहरी’ अभियान सुरु गरेको छ । सो अभियान नगरवासीका समस्या र गुनासो सुन्न नगर प्रहरी स्थानीयवासीको घरघरमै पठाउने उद्देश्यले सुरु गरिएको हो ।

बिहीबार बिहान अभियानको उद्घाटन गर्दै मेयर चिरिबाबु महर्जनले नगरवासीका समस्या पहिचान गर्न, नगर प्रहरी र सुरक्षाको अनुभूति गराउन, जनताले कर तिरे–नतिरेको बुझ्न, महानगरको सेवाको पहुँच बुझ्न यस अभियानले मद्दत पुर्‍याउने बताए ।

मेयर मर्हजनका अनुसार यो अभियानमा दैनिक पाँच जनाको एउटा समुह बनाएर ५० जना नगर प्रहरी खटाईनेछ । यसो गर्दा दैनिक तीन हजारभन्दा बढी घरमा नगर प्रहरी पुग्नेछ । नगर प्रहरीले नगरपालिकाका सेवाहरू नगरवासीले लिए–नलिएको बुझ्नेछ भने निःशुल्क दमकल, ढल निकास, शववाहन, फुटपाथलगायत सेवाबारे जानकारी गराउनेछ ।

घरघरमा पुगेर संकलन गरिएका गुनासा र समस्याबारे नगर प्रहरीले हरेक साता मेयर महर्जनलाई जानकारी गराउनेछ ।