काठमाडौं महानगरपालिकामा ६१ प्रतिशत विवाद वडामै समाधान भएका छन् । महानगरले हरेक वडामा सञ्चालन गरेको मेलमिलाप केन्द्रले वडास्तरमा निम्तिएका विवादमध्ये ६१ प्रतिशत विवाद वडामै समाधान गरेका हुन् ।

शुक्रबार महानगरले आयोजना गरेको ‘विवाद व्यवस्थापन वडा कार्यालयको भूमिका अभिमुखीकरण’ कार्यक्रममा महानगरकी उपप्रमुख सुनिता डंगोलले वडामै विवाद समाधान हुँदा न्यायिक समितिको कार्यबोझ घटेको र वडास्तरमै मेलमिलापको अभ्यास भइरहेको बताइन् ।

महानगरपालिकामा उपप्रमुखको संयोजकत्वमा न्यायिक समिति गठन हुने व्यवस्था छ । कानूनले नै स्थानीय तहको क्षेत्रभित्र उत्पन्न विवादहरु समाधान गर्न न्यायिक समितिको कार्यक्षेत्र तोकेको बेलामा काठमाडौं महानगरपालिकाले भने न्यायिक समितिमार्फत् वडास्तरमै मेलमिलाप केन्द्रहरु सञ्चालन गरी त्यसलाई व्यवस्थित गरेको हो ।