भैरवी गाउँपालिकाको जलजले क्षेत्रमा पेट्रोलियम पदार्थको अन्वेषणअन्तर्गत ड्रिलिङको ४० प्रतिशत काम सम्पन्न भएको छ। गत जेठदेखि सुरु गरिएको ड्रिलिङको काम ४ महिनामा पूरा हुने लक्ष्य रहेकोमा कडा चट्टानका कारण १ महिना ढिलाइ हुने अनुमान गरिएको छ।

चिनियाँ र नेपाली टोलीले ३ महिनादेखि २ चरणमा ड्रिलिङ गरिरहेका छन्। हालसम्म १,६६६ मिटर ड्रिलिङ सम्पन्न भएको छ, जसमा ४ हजार मिटर गहिराइसम्म ड्रिलिङ गर्नु पर्ने छ। खानी तथा भूगर्भ विभागका सिनियर डिभिजन भूगर्भविद् सुरेश श्रेष्ठले पेट्रोलियम पदार्थको सम्भावनाका संकेतहरू सफलतापूर्वक प्राप्त भइरहेको जानकारी दिए।

चीन सरकारको २ अर्ब ५० करोड रुपैयाँ अनुदानमा भइरहेको यो अन्वेषणले सफल भएमा देशको आर्थिक अवस्था सुधार हुने र ठूलो संख्यामा रोजगारी सिर्जना हुने अपेक्षा गरिएको छ।