रुकुम पूर्व, मंसिर ५ः पुथा उत्तरगंगा गाउँपालिका उपाध्यक्ष पदमा उम्मेदवारी दिएका पाँचजनाले आफ्नो उम्मेदवारी फिर्ता लिएका छन् ।

मंसिर २ गते आइतबार उपाध्यक्ष पदका लागि सातजनाले उम्मेदवारी दिएका थिए । तर, बुधबार पाँचजना उम्मेदवारले उम्मेदवारी फिर्ता लिएसँगै एमाले र माओवादी केन्द्रबीच प्रतिस्पर्धा हुने भएको छ ।

बुधबार नेकपा एकीकृत समाजवादीकी सुनिता बुढा, स्वतन्त्रतर्फका मोहनभक्त बुढा, श्रीदेवी सुनार विक, भिमकुमारी पुन मगर र कोपिला बुढा पुनले आ–आफ्नो उम्मेदवारी फिर्ता लिएका हुन् । अब नेकपा एमालेकी केशकुमार तुलाचन र माओवादी केन्द्रकी उम्मेदवार नरपूरा बुढा चुनावी मैदानमा छन् । तुलाचनलाई कांग्रेसको समर्थन छ भने बुढालाई एकीकृत समाजवादीले सघाउने भएको छ ।

जिसस प्रमुख, गाउँपालिका अध्यक्ष र उपाध्यक्ष, नगरपालिका प्रमुख र उपप्रमुख तथा वडाध्यक्षको रिक्त ४४ पदपूर्ति गर्न यही मंसिर १६ गते उपनिर्वाचन हुन लागेको हो ।