विराटनगर । मोरङको ग्रामथान गाउँपालिकाका अध्यक्ष नमोनारायण माझीले प्रमुख प्रशासकीय अधिकृत राजाराम पौडेलले प्रहरीलाई उत्खनन् कार्य रोक्न पत्र पठाएको भन्दै स्पष्टीकरण सोधेका छन् । 

प्रशासकीय अधिकृत पौडेलले यही पुस ८ गते गाउँपालिका– २ को बिर्ता जाने नहर, सडक लगायतका सार्वजनिक स्थलबाट गैरकानूनी रूपमा माटो निकालेर बेच्नेहरूलाई कारबाही गर्न भन्दै प्रहरीलाई पत्र लेखेका थिए ।

उनले प्रहरीलाई पठाएको पत्रमा भनिएको छ, ग्रामथानअन्तर्गतका विभिन्न नहर र सडकबाट गैरकानूनी रूपमा उत्खनन् भइरहेको सूचना आएको र गाउँपालिकाले अनुगमन गर्दासमेत उत्खनन् भइरहेको पाइएकाले गैरकानूनी उत्खनन् रोकी सवारीसाधन नियन्त्रणमा लिइदिन अनुरोध छ ।’ 

त्यसबारे प्रहरीलाई पत्र लेखेको भन्दै पालिका अध्यक्ष माझीले पुस ११ गते प्रशासकीय अधिकृत पौडेललाई स्पष्टीकरण सोधेका हुन् । ‘प्रहरीलाई के कति कारणले पत्र काटिएको हो ? भनेर प्रशासकीय अधिकृत पौडेलसँग स्पष्टीकरण सोधिएको छ ।