रायपुर (भारत) । भारतीय सुरक्षा बलको सर्च अप्रेशनमा १४ माओवादी विद्रोहीको मृत्यु भएको छ ।

मारिनेमा माओवादीका शीर्षमध्येका एक जयराम वा चलपति भनिने कमान्डरसमेत रहेको भारतीय सञ्चारमाध्यमहरूले जनाएका छन् ।

भारतीय गृहमन्त्री अमित शाहले सामाजिक सञ्जालमार्फत यसलाई हालैका लडाईंहरूमध्ये सबैभन्दा ठूलो जित भएको प्रतिक्रिया दिएका छन् । ‘नक्सलवादलाई अर्को ठूलो झट्का’, गृहमन्त्री अमित शाहले लेखेका छन् ।

विद्रोहीहरूलाई परास्त गर्न सन् २०२६ मार्चको समयसीमा तय गरेका शाहले ‘नक्सलवादले अन्तिम सास फेरिरहेको’ बताएका छन् ।

भारतीय गृह मन्त्रालयले मारिएका कमान्डर जयराम वा चलपति भनेर चिनिने नेता भएको र उनको टाउकोमा एक लाख १५ हजार डलरको इनाम रहेको जनाएको छ ।

नयाँदिल्लीले दशकौँ लामो द्वन्द्व अन्त्य गर्ने प्रयासलाई तीव्र पारेको छ । भारतको छत्तीसगढ राज्यको जङ्गलमा रहेका छापामारहरूको गढमा १६ जनवरीमा पनि १२ जना माओवादी मारिएका थिए ।

भारतको स्रोत सम्पन्न मध्य क्षेत्रमा सीमान्तकृत जनताको अधिकारका लागि लड्दै आएका विद्रोहीहरूले गरेको दशकौं लामो विद्रोहमा १० हजारभन्दा बढी मानिसको मृत्यु भएको छ । सरकारी तथ्याङ्कअनुसार सन् २०२४ मा करिब २८७ विद्रोही मारिएका थिए ।

यस क्षेत्रमा अतिरिक्त बल पठाइएको प्रहरीले जनाएको छ । ‘सुरक्षा बल अझै जङ्गलभित्र छ’, छत्तीसगढको माओवादी विरोधी अभियानका प्रमुख विवेकानन्द सिन्हाले भने । माओवादीहरूले स्थानीय बासिन्दाहरूका लागि जग्गा, रोजगारी र यस क्षेत्रको अपार प्राकृतिक स्रोतको हिस्सा माग गर्दै आएका छन् ।