काठमाडौं । आइसीसी महिला यु–१९ टी–२० विश्वकपमा नेपालले आज अष्ट्रेलियासँग प्रतिस्पर्धा गर्दैछ । प्रतियोगितामा नेपालले आज तेस्रो खेल खेल्न लागेको हो । नेपाल पहिलो खेलमा बंगलादेशसँग ५ विकेटले पराजित भएको थियो भने दोस्रो खेलमा स्कटल्याण्डसँग एक विकेटले पराजित भएको थियो । लगातार २ खेल हारेको नेपाललाई आजको खेल जित्नै पर्ने दबाब छ ।

नेपालको समूह  ‘डी’ मा स्कटल्यान्ड, बङ्गलादेश र अस्ट्रेलिया छन् । प्रतियोगितामा शीर्षस्थानमा रहेको अस्ट्रेलियाले दुई खेलबाट ४ अंक जोडेको छ । बंगलादेश र स्कटल्यान्डको समान २ अंक रहँदा नेपाल भने अंकविहीन छ। विश्वकपमा विभिन्न १६ राष्ट्रको सहभागिता रहेको छ । जसलाई चार समूहमा विभाजन गरिएको हो । प्रत्येक समूहका शीर्ष तीन टोली सुपर सिक्समा प्रवेश गर्नेछन् ।