काठमाडौं । बिहीबारको प्रतिनिधिसभा बैठकमा सरकारले ल्याएका ६ वटा अध्यादेश स्वीकृतका लागि प्रस्तुत गर्ने भएको छ । बुधबार सभामुख देवराज घिमिरेको पहलमा सिंहदरबारमा बसेको प्रमुख दलका प्रमुख सचेतक र सचेतकरूसँगको छलफलमा अध्यादेश अस्वीकृतको प्रस्तावकर्ताले ५ मिनेट र समर्थकले ३ मिनेट बोल्न पाउने सहमति भएको छ ।  

छलफलमा कानुन न्याय तथा संसदीय मामिलामन्त्री अजयकुमार चौरसिया पनि थिए । अध्यादेश अस्वीकृतको प्रस्तावकर्तालाइ ५ मिनेट र समर्थकलाई ३ मिनेट बोल्न दिने तय भएको छलफलपछि कानुनमन्त्री चौरसियाले जानकारी दिए ।  
 
६ वटा अध्यादेशउपर प्रतिनिधिसभामा ५० वटा अस्वीकृतको सूचना दर्ता भएका छन् । बिहीबार प्रतिनिधिसभामा सबै अध्यादेशहरू निर्णयार्थ पेस गर्नु अगाडि अस्वीकृतको सूचना दिनेलाई बोल्न दिइनेछ । बिहीबार नै सभाले अध्यादेश स्वीकृत वा अस्वीकृतको निर्णय गर्ने मन्त्री चारसियाले बताए ।