पथरी । एसियन हाईवे निर्माणका क्रममा मोरङको पथरीशनिश्चरे वडा नम्बर १० स्थित जिरिखिम्तीमा देखिएको जग्गा विवाद सरोकारवालाको ढिलासुस्तीका कारण अझै समाधान हुन नसक्दा स्थानीयवासी थप त्रासमा परेका छन् ।

कानेपोखरी गाउँपालिका र पथरीशनिश्चरे नगरपालिकाको सिमानामा पर्ने जिरिखिम्ती क्षेत्रको मोरङ्गी खोला र डाँस खोलाबीच करिब एक किलोमिटर लामो सडक गलत स्थानमा निर्माण गरिएको स्थानीयको गुनासो छ । नक्साअनुसार हाल सञ्चालनमा रहेको सडकभन्दा करिब २५ देखि ३० फुट दक्षिणतर्फ सडक पर्नुपर्ने भए पनि निर्माणकै क्रममा अर्कै स्थानमा बनाइँदा स्थानीयलाई निरन्तर समस्या व्यहोर्नु परेको हो ।

स्थानीयका अनुसार, आफ्नो घर तथा जग्गाको नक्सामा सडक देखाइएपछि न जग्गा बिक्री गर्न सकेका छन्, न त बैंकिङ कारोबार नै गर्न पाएका छन् । वर्षौंदेखि रहँदै आएको यही समस्याले जिरिखिम्ती क्षेत्रको समग्र विकास निर्माणमा असर परेको स्थानीयको गुनासो छ ।

त्यस्तै, सोही स्थानमा पेट्रोल पम्प सञ्चालनको तयारीमा रहेका केही व्यवसायीले समेत जग्गा विवादकै कारण प्रक्रिया अघि बढाउन नसकेपछि पम्प सञ्चालन हुन सकेको छैन ।

नेपाल सरकारको गौरवको योजना अन्तर्गत सार्क राष्ट्रहरूलाई जोड्ने एसियन हाईवे निर्माणको क्रममा देखिएको यो समस्या समाधान नभएकै कारण हाल सो क्षेत्रमा सडक निर्माण कार्य स्थगित गरिएको छ । तर, मोरङ्गी खोला र डाँस खोलामा बन्ने नयाँ पुल निर्माण कार्य भने अन्तिम चरणमा पुगेको छ, जसले गर्दा स्थानीय अझै बढी चिन्तित छन् ।

सडक निर्माण आयोजना प्रमुख जगत प्रजापति भन्छन्, “समस्या समाधान नभएसम्म जिरिखिम्ती क्षेत्रमा सडक विस्तार नगरिने हो । समाधानका लागि चरणबद्ध छलफल चलिरहेको छ ।”

सन् २०२०–२२ तिर बनेको सो सडक निर्माणमा देखिएको लापरबाहीकै कारण आजसम्म पनि आफूहरू समस्यामा परेको पीडित मदन पोखरेल बताउँछन् ।

हाल दर्जनौं घरपरिवारले यही समस्या भोगिरहेका छन् । वर्षौंदेखि मालपोत तिर्दै आएको आफ्नो जग्गाको समस्या राज्य पक्षबाट समाधान नभएपछि निराश बनेको पोखरेलको भनाइ छ ।