काठमाडौं । मेडिकल व्यवसायी दुर्गा प्रसाईं र उनका अंगरक्षक दीपक खड्कालाई काठमाडौं ल्याइएको छ । उनीहरुलाई शुक्रबार झापाको चन्द्रगढी विमानस्थलबाट बुद्ध एयरको जहाजमार्फत काठमाडौं ल्याइएको हो ।

बिहीबार भारतमा पक्राउ परेका प्रसाईंलाई आज बिहान १० बजे सीमा क्षेत्रमा ल्याइएको थियो । प्रसाईंको सचिवालयले उनले आसाम प्रहरी समक्ष आत्मसमर्पण गरेको जानकारी दिएको थियो । यता प्रहरीले भने शुक्रबार बिहान उनीहरुलाई भद्रपुर क्षेत्रबाट पक्राउ गरेको दाबी गरेको छ ।

चैत १५ गते काठमाडौंको तीनकुनेमा भएको हिंसात्मक प्रदर्शनमा संलग्न गरी राज्य विरुद्ध र संगठित अपराधसम्बन्धी कसूरमा प्रहरीको खोजिमा रहेका प्रसाईं फरार थिए । उनलाई नेपाल ल्याउन नेपाल प्रहरीको विशेष ब्यूरो र काठमाडौं उपत्यका अपराध अनुसन्धान कार्यालयको टोली भारत पुगेको थियो ।

प्रसाईंलाई शुक्रबार नै म्याद थप गर्ने तयारी भइरहेको प्रहरी स्रोतले जानकारी दिएको छ । प्रहरीले म्याद थपका लागि आवश्यक कागजात तयार गरिरहेको छ ।