बजेटलाई लिएर बागमतीमा विवाद, प्रदेशसभा बैठक स्थगित
मेयरसाप डेस्क | ४ घण्टा अगाडि 
मकवानपुर । बागमती प्रदेशसभाको आजका लागि बोलाएको बैठक स्थगित भएको छ । अपरान्ह १ बजे बस्ने भनिएको बैठक आज अबेरसम्म पनि बस्न नसकेपछि विशेष कारण देखाउँदै सूचना टाँसेर स्थगित गरिएको हो । अब यही असार १९ गते दिनको ११ बजे बैठक बस्ने प्रदेशसभा सचिव रामकुमार पौडेलले जानकारी दिए ।
सभामुख भुवनकुमार पाठकले सत्तापक्ष र प्रतिपक्षसँगको सहमतिअनुसार असार १९ गते बिहीबार दिनको ११ बजे बस्ने गरी बैठक आह्वान र सोहीअनुसार सबै सदस्यलाई सूचना गरिएको बताए ।
गत असार १ गते प्रदेशसभाको बैठकमा प्रस्तुत आव २०८२/०८३ को बजेट निष्पक्ष र पारदर्शी नभएको, व्यक्तिमुखी भएको भनि सत्तापक्ष दलका केही सदस्य र प्रतिपक्ष दलका सदस्यको प्रतिरोध गरिरहेका छन् । सोही कारण आजको बैठक स्थगित हुन पुगेको राप्रपा संसदीय दलका नेता उद्धव थापा र माओवादी केन्द्र संसदीय दलका प्रमुख सचेतक रत्नप्रसाद ढकालले जानकारी दिए ।
