१६ जना हायु परिवार हराएको घटनाः ऋणको तनावले परिवार भागेको हुनसक्ने आशंका
मेयरसाप डेस्क | एक दिन अगाडि 
काठमाडौं । सिन्धुलीको गोलञ्जोर गाउँपालिका वडा नम्बर ६ का हायु परिवारका १६ जना हराएको घटनामा ऋणको तनाव हुनसक्ने आशंका स्थानीयबासीहरूले गरेका छन् ।
वडा नम्बर ६ का अध्यक्ष रबिनकुमार श्रेष्ठका अनुसार हायु परिवारले केही समयअघि तीन महिनाको भत्ता निकालेर भत्ता नबिकरण गरेका थिए । अध्यक्ष श्रेष्ठका अनुसार गएको बिहीबार उनीहरूमध्ये केही खुर्कोट बजारमा देखिएको स्थानीयबासीले जानकारी गराएका छन् । शुक्रबारदेखि उनीहरू घरमा नआएको आशंका गरिएको छ ।
घरमा भएका कुखुरा र बाख्रा खुल्लै छाडेको अवस्थामा भेटिएको छ । घरमा फुसको छानो भएको भान्साजस्तो ठाउँमा आगलागी भएको देखिएको अध्यक्ष श्रेष्ठले जानकारी दिए । घरमा खाने भाडाहरु छरपष्ट अवस्थामा रहेको अध्यक्ष श्रेष्ठले जानकारी दिए । भैँसी भने केही पर अर्को छिमेकीको गोठसँगै बाँधेको अवस्थामा भेटिएको अध्यक्ष श्रेष्ठले जानकारी दिए ।
छिमेकीका बस्तुसँगै भैँसी बाँधेकाले छिमेकीले आफ्ना चौपायलाई घाँस हाल्दा अलिअलि घाँस हाल्दिएको तर भैँसीलाई घाँस हाल्न नआएपछि छिमेकी उनको घरमा खोजी गर्न गएका थिए । हायु परिवारको घर जंगलको छेउमा अरु मान्छेहरुको भन्दा २५ मिनेटजति टाढा रहेको छ ।
१६ जना परिवारको तीन महिनाको भत्ता १ लाख ५० हजारभन्दा बढी निकासा भएपछि उनीहरु ऋण उठाउन आउनेहरुका डरले भागेको आशंका स्थानीयबासीहरुको छ । वडा अध्यक्ष श्रेष्ठका अनुसार उर्मिला हायुको परिवारले ऋण उठाउन मान्छेहरू आउनेगरेकाे जानकारी छिमेकीहरूलाई गराएका थिए । हायु लाेकउन्मुख जाति भएकाले सरकारले उनीहरूलाई भत्ता दिँदै आएकाे छ । प्रहरीले उनीहरुको लोकेसन ट्रेस गरिरहेको छ ।
दिइएका व्यक्तिहरु मध्ये एकजनाको लोकेसन रामेछाप देखिएको जिल्ला प्रहरी कार्यालय सिन्धुलीले जानकारी दिएको छ । सशस्त्र प्रहरी बलले पनि हायु परिवारको खोजी गरिरहेको छ । उर्मिला हायु परिवारमा उनका श्रीमानको मृत्यु भइसकेको र ६ जना छोरा, ६ जना छाेरी, बुहारी र नाति रहेको वडाले जानकारी दिएको छ ।
याे पनि पढ्नुहाेस्
गोलञ्जोरमा बाख्रा, कुखुरा, भैँसी अलपत्र छाडेर एकै परिवारका १६ जना बेपत्ता
