सहिद परिवारका लागि प्रतिष्ठानले विभिन्न कार्यक्रम ल्याउँदै

मेयरसाप डेस्क

महेन्द्रनगर । मधेशी सहिद प्रतिष्ठानले चालू आर्थिक वर्षमा सहिद परिवारलाई लक्षित गरी विभिन्न कार्यक्रमहरू कार्यान्वयन गर्ने भएको छ ।

प्रतिष्ठानका अध्यक्ष तथा गृह, सञ्चार तथा कानुनमन्त्री राजकुमार लेखीको अध्यक्षतामा बसेको बैठकमा यस वर्ष विनियोजित २ करोड रुपैयाँको बजेटलाई सहिद परिवार र उनीहरूका सन्तानलाई प्रत्यक्ष लाभ पुग्ने गरी खर्च गर्ने निर्णय गरिएको छ ।

बैठकमा सहिद परिवारको सम्मानका लागि स्वास्थ्य, शिक्षा र सीप विकास लगायतका कार्यक्रमहरू प्रभावकारी रूपमा सञ्चालन गर्नेबारे छलफल भएको गृहसचिव बिमलप्रसाद बरालले बताए ।

प्रतिष्ठानले सहिदको ’प्रोफाइल’ निर्माण र प्रकाशन, सहिद स्मृति पुरस्कार, स्वास्थ्य बिमा, बलिदानी दिवस आयोजना, सहिदका सन्तानलाई छात्रवृत्ति, सीप विकास र लोकसेवा तालिम सञ्चालन गर्ने तथा सहिद स्मृति पार्क निर्माण गर्नेलगायतका निर्णय गरेको छ ।