म्यान्माको सैन्य सरकारद्वारा 'केएनयु'लाई आतङ्कवादी सङ्गठन घोषणा

मेयरसाप डेस्क

काठमाडौं । म्यान्माको सैन्य सरकारले जातीय समूह करेन नेसनल युनियन (केएनयु) लाई ’आतङ्कवादी सङ्गठन’ घोषणा गरेको छ । यो घोषणासँगै केएनयुसँग सम्बन्धित कुनै पनि गतिविधि वा सम्पर्कलाई अब गैरकानुनी मानिनेछ ।

सन् १९४८ मा म्यान्मा स्वतन्त्र भएदेखि नै केएनयुले थप स्वायत्तताका लागि सङ्घर्ष गर्दै आएको छ । सन् २०२१ मा सेनाले सत्ता कब्जा गरेपछि सुरु भएको गृहयुद्धमा यो समूह सक्रिय रूपमा संलग्न छ ।

केएनयुका प्रवक्ता पडोह साव ताव नीले यो घोषणालाई बेवास्ता गर्ने बताएका छन्। उनले भने, “वास्तविक आतङ्कवादी को हुन् भन्ने प्रमाण चाहिँदैन। म्यान्माको सेनालाई नै अन्तर्राष्ट्रिय न्यायाधिकरणले दोषी ठहर गरेको छ ।”

सैन्य सरकारले डिसेम्बर २८ बाट सुरु हुने राष्ट्रिय चुनावमा केएनयुले अवरोध गर्ने वाचा गरेपछि यो घोषणा आएको हो । सेनाले केएनयुमाथि ’सार्वजनिक सुरक्षा, जीवन र सम्पत्तिमा गम्भीर क्षति पुर्याएको’ आरोप लगाएको छ ।

आलोचकहरूले सेनाको यो कदमलाई आउँदो चुनावलाई वैधता दिने प्रयासका रूपमा लिएका छन् । सैन्य सरकारले नयाँ निर्वाचन कानुन ल्याएको छ, जसअनुसार चुनावमा अवरोध गर्नेलाई मृत्युदण्डसमेत दिन सकिने व्यवस्था छ ।

केएनयूले प्रजातन्त्र समर्थक मिलिसियाहरूसँग मिलेर सेनाविरुद्ध सशस्त्र सङ्घर्ष गरिरहेको छ र सैन्य सरकारले गरेको शान्ति वार्तामा सहभागी हुन अस्वीकार गरेको छ ।