प्रधानमन्त्रीलाई चीन जानुअघि राष्ट्रियतामा स्पष्ट हुन रास्वपाकाे आग्रह

मेयरसाप डेस्क

काठमाडौं । राष्ट्रिय स्वतन्त्र पार्टीका सांसद गणेश पराजुलीले प्रधानमन्त्री केपी शर्मा ओलीलाई चीन भ्रमणमा जानुअघि सदनबाट राष्ट्रियताको विषयमा साझा अवधारणा बनाउन आग्रह गरेका छन् ।

शुक्रबार प्रतिनिधिसभाको बैठकमा बोल्दै उनले सन् १८१६ को सुगौली सन्धिले नेपालको पश्चिमी सीमा काली नदी रहेको स्पष्ट पारेको बताए ।

उनले ब्रिटिस लाइब्रेरी र अन्य ऐतिहासिक नक्साहरूले पनि लिम्पियाधुराबाट निस्केको काली नदी नै नेपालको पश्चिमी सीमा भएको प्रमाणित गरेको दाबी गरे ।

पराजुलीले नेपालको सहमतिबिना भारत र चीनबीच लिपुलेक मार्ग प्रयोग गर्न गरिएको समझदारी अन्तर्राष्ट्रिय कानुनअनुसार अवैध भएको बताए ।

उनले सरकारलाई माइतीघर मण्डलामा आन्दोलन गरिरहेका उखु किसानका समस्या यथाशीघ्र समाधान गर्न पनि आग्रह गरे ।