सुदर्शनदेव भट्ट विशेष अदालतको अध्यक्षमा नियुक्त

मेयरसाप डेस्क

काठमाडौं । उच्च अदालतका न्यायाधीश सुदर्शनदेव भट्ट विशेष अदालतको अध्यक्षमा नियुक्त भएका छन् ।

शुक्रबार बसेको मन्त्रिपरिषद्को बैठकले न्याय परिषद्को सिफारिसमा उनलाई सो पदमा नियुक्त गर्ने निर्णय गरेको हो ।

त्यस्तै, मन्त्रिपरिषद्ले अन्य चार जना न्यायाधीशहरूलाई विशेष अदालतको सदस्यमा तोकेको छ ।

सदस्यमा नियुक्त हुनेहरूमा उच्च अदालत वीरगञ्ज इजलासका न्यायाधीश नारायणप्रसाद पौडेल, उच्च अदालत सुर्खेतका न्यायाधीश हेमन्त रावल, जुम्ला इजलासका न्यायाधीश डिल्लीरत्न श्रेष्ठ र वीरगञ्ज इजलासका न्यायाधीश उमेश कोइराला रहेका छन् ।

कानुनी व्यवस्थाअनुसार, विशेष अदालतका अध्यक्ष र सदस्यहरूलाई न्याय परिषद्को परामर्शमा सरकारले तोक्ने गर्दछ ।

यसअघि विशेष अदालतका अध्यक्ष रहेका टेकनारायण कुँवर भने उच्च अदालत जनकपुरको न्यायाधीशमा सरुवा भएका छन् ।