वीरगञ्जको हैजा नियन्त्रणमा सुरक्षा निकाय परिचालन गर्छौं : प्रधानमन्त्री ओली

मेयरसाप डेस्क

काठमाडौं । प्रधानमन्त्री केपी शर्मा ओलीले पर्साको वीरगञ्जमा हैजाको महामारी नियन्त्रण गर्न नेपाली सेनासहित चारवटै सुरक्षा निकायका चिकित्सक र उपकरण परिचालन गरिने बताएका छन् ।

प्रतिनिधिसभाको बैठकलाई सम्बोधन गर्दै प्रधानमन्त्री ओलीले आजको मन्त्रिपरिषद् बैठकले यो निर्णय गरेको जानकारी दिए । उनले यस कदमले वीरगञ्जमा फैलिएको हैजा नियन्त्रणमा आउने विश्वास व्यक्त गरे ।

हैजाका कारण तीन जनाको निधन भएकामा दुःख व्यक्त गर्दै उनले महामारीको स्रोत पत्ता लगाउन सरकारले अनुसन्धान गरिरहेको बताए ।

उनले नारायणी अस्पतालमा हैजाका बिरामीहरूको निःशुल्क उपचार भइरहेको र सचेतनाका कार्यक्रमहरू पनि सञ्चालन गरिएको सदनलाई जानकारी गराए ।