उखु किसानलाई अनुदान बढाउन सांसदहरूको माग

मेयरसाप डेस्क

काठमाडौं । राष्ट्रियसभाको आजको बैठकमा सांसदहरूले उखु किसानलाई दिँदै आएको अनुदान बढाउन सरकारसँग माग गरेका छन् ।

बैठकको शून्य समयमा बोल्दै सांसद गङ्गाकुमारी बेल्वासेले उखु किसानलाई विगतमा दिइँदै आएको अनुदानलाई निरन्तरता दिनुपर्ने बताइन् ।

सांसद गोपाल भट्टराईले बाढी र पहिरोले अवरुद्ध तातोपानी र रसुवागढी नाका चाँडो सञ्चालन गर्न तथा कोरला नाका खोल्न पहल गर्न सरकारको ध्यानाकर्षण गराए ।

सांसद जगप्रसाद शर्माले सत्यनिरूपण तथा बेपत्ता व्यक्तिको छानबिनका लागि बनेको कानुनको प्रगतिबारे जानकारी माग गरे ।

सांसद तुलसाकुमारी दाहालले महिला हिंसाका घटना बढ्दै गएको भन्दै यसको रोकथामका लागि पहल गर्नुपर्नेमा जोड दिइन् ।

सांसद मायाप्रसाद शर्माले इम्बोस्ड नम्बर प्लेट जडानमा चर्को शुल्क लिइएकोमा गुनासो गर्दै नेपाली अक्षरको नम्बर प्लेट राख्न आवश्यक रहेको बताए ।

सांसद शारदादेवी भट्टले वर्षायाममा डेङ्गी, मलेरिया र हैजालगायतका महामारीको जोखिम बढेको भन्दै सरकारको ध्यानाकर्षण गराइन् ।

सांसद सुमित्रा विसीले लिपुलेक नाकाबाट भारत र चीनले व्यापारिक नाका खोल्ने सहमति गरेको विषयलाई कूटनीतिक रूपमा समाधान गर्नुपर्ने धारणा राखिन् ।

बैठकमा अर्थमन्त्री विष्णुप्रसाद पौडेलले अर्थ मन्त्रालयसँग सम्बन्धित मौखिक प्रश्नहरूको जवाफ दिने तथा विभिन्न विधेयकहरू सदनमा पेस गर्ने कार्यसूची रहेको छ ।